تجارب التقديم - تجربة العضو محمد علي - احد المتابعين مع التقديم للكلية الحربية - التقديم لكليه الشرطه

صبرا على مالم تحط به خبرا

اللهم انى استودعتك كل هذا ولا تضيع عندك الودائع

الحمد لله ع كل شئ

البداية..

من صغرى وأنا بحلم أبقى ضابط فى الجيش حلم كدا من وأنا صغير حاطه قدامى دايما

ولحد دلوقتى لسن 24 سنه هوة السبب ف قلب حياتى رأس على عقب 

الحمد لله دائما وأبدا كل حاجة لحكمة من الله سبحانه وتعالى

كنت عارف ان الجيش بيحبو الشخص الرياضى وأنا من صغرى بلعب رياضة من وأنا 5 سنين لحد دلوقتى.

1

اول محاولة كانت بعد 3 اعدادى قدمت فى التمريض العسكرى ويوم الكشف الطبى خدو 2 وسقطو باقى المجموعة من غير كشف وأنا كنت منهم ! وقولت عادى مفيش نصيب ودخلت الثانوى وكنت عارف إن الحربية بتاخد من أدبى فدخلت أدبى, وسبحان الله كنت كل ما بكبر بعرف إن الحلم ده مش سهل يتحقق وكان نفسى إنى لو مدخلتش حربية ادخل صحافة وإعلام وكانت كل سنه بتاخد من 79% وانا جبت 80% فخدت السنه بتعتى من 81% فقولت نصيب والحمد لله.

2

كنت مقدم وقتها اول محاولة ليا فى الكلية الحربية دفعة 109 وشوفت الصعوبة وأنا بعدى من الطبى والألآف بيطلعو منه فقولت الحمد لله لعله خير ان ربنا موقفش حلمى عند إنى أطلع من الطبى وإن جسمى يبقى سليم وأعدى من غير أى إلتماس "وده الحمد لله فى ال5 سنين اللى قدمت فيهم وده حاجة من عند ربنا كدا وسبب ربنا وجده علشان القصة تكمل كدا", وجبت رياضى 198 من 200 وتفوق رياضى فى الملاكمة والهيئة كانت تمام وكانو بيهزرو معايا وشايف القبول فى وشهم والحلم بدأ يكبر, وفى وقتها كنت أول مرة أروح جامعة الأزهر وكنت رايح أقدم فى كلية تربية رياضية اللى كنت حاتطها حلم تالت ليا حاجة كدا حاببها وبمارسها من صغرى, روحت لقيت فى زحمة كتير والملف كان غالى وكنت ساعتها ماشى فى إختبارات الحربية كويس فرجعت ومقدمتش فيها "وندمت على ده طول فترة دراستى فى الكلية بس كنت بقول لعله خير وربنا ليه حكمة فى كدا", وكنت كاتب فى التنسيق كليات القمة الأول ومنهم كلية اللغات والترجمة مع إنى مش بحب اللغات وكنت عارف انها مش هتيجى علشان كنت جايب فى الانجليزى اقل من 70% شرط دخول كليه اللغات ... بس سبحان الله جاتلى ومكنتش مهتم بيها ولا روحتها علشان كنت متفائل بموضوع الحربية ده لحد ما كلمونى بعد الهيئة بشهر ع محضرين على ناس قرايبى واحد "براءة" وواحد "حفظ" ومكنتش أعرف أصلاً إن حد فى عيلتى عليه محاضر بس ده كان سبب برده علشان القصة تكمل زى ما ربنا رايدلها...

وطلبو منى إثبات من النيابة المحاضر ده خلصت على إيه, فقولت هما لو مش عاوزنى مكنوش كلمونى وجبت الإثبات وسلمته فى الكلية الحربية والمهم محصلش نصيب بسببهم وسقطت! وناس أقل منى بكتير فى الدرجات نجحت!!

احباط ويأس ساعتها بس قولت برده قدر الله ما شاء فعل وقولت اروح اشوف الكلية بتعتى روحت لقيت نفسى فى قسم أفريقى!! صدمة تانى حاولت أحول قالو امتحانات الترم خلاص ناقصلها أقل من شهر وباب التحويل قفل ابقى حول السنه الجاية! وأنا من جوايا أفريقى!! والدنيا أصلا سوده لوحدها قدامى بعد حوار الحربية ده بس قولت قدر الله ما شاء فعل أنا سعيت وده حاجة مش بإيدى وربنا إخترهالى أعمل اللى عليا فيها السنادى وأبقى أقدم حربية تانى السنه الجاية على أمل إنى ادخل الهيئة "لو وصلتلها" وأقول للواء عصمت مراد مدير الكلية الحربية وقتها سبب طلوعى السنه اللى فاتت "حلم بقى وشاب ومتعلق بقشاية" وكتبت اللى عايز اقوله ده فى ورقه وفضلت معايا طول السنه ده وسبحان الله نجحت فى اول سنه وجبت تقدير جيد وكانت سنه متعبة ربنا وحده أعلم بيها...

3

قدمت السنه التانية دفعة 110 واخر فرصة ليا بعد الثانوى, ونفس النظام مقفل كل حاجة والرياضى 188 ونقصت عن السنه اللى قبلها 10 درجات علشان السباحة اللى خلوها بدرجات وانا كنت بعوم عرض الحمام فيعتبر لو بحساب اول سنه انا جايب 198 طول سنين تقديمى والحمد لله المهم الحلم جه تانى ووصلت الهيئة والورقة اللى كانت معايا طول السنه كانت فى جيبى واللواء عصمت مراد برده كنت شايف فى وشه القبول وهزر معايا وقالى فى الاخر أنتا إيه اللى مشبطك هنا! قولتله حلم حياتى يافندم وحبى للعسكرية والإنضباط وقالى بالتوفيق وعلى وشه برده القبول وسبحان الله خفت أقول اللى فى الورقة اللى صبرت نفسى بيه سنه كامله لأبوظ الهيئة اللى كانت مثالية ولفيت وطلعت ومقولتش حاجة "وندمت برده على إنى مقولتش إللى نفسى فيه" وقولت لعله خير, جه يوم ظهور النتيجة بتاعة الهيئة بتصل على الاستعلام الصوتى قالى رقم قيدك غير لائق زعلت وقولت برده قدر الله ما شاء فعل وصليت ركعتين ويارب إن مستقبلى بيدك وأنا راضى بما قدرته فأكتب ليا الخير وعوضنى خيرا وقولت اروح الكلية بتاعتى بقى من أول الاسبوع علشان مكنتش روحتها خالص وأنا خلاص بقيت فى تانية, سبحان الله قومت الصبح لقيت رسالة العرض العام جيالى!!

أكبر فرحة كانت فى حياتى "اتخيلو الشعور كدا"...

وقولت التحريات شكلها عدت والحلم كبر أوى وطبعا مروحتش الكلية وروحت العرض العام واستنيت بعده الرسالة بتاعت الرياضة المتقدم جت للناس اللى كانو معايا فى العرض العام وانا لا وبعدين جتلهم رسالة اخر اختبار معلومات عن مصر وانا لسه مجاليش الرياضى المتقدم قولت شكلى طلعت تحاليل فى العرض العام لقيت الكلية الحربية بتكلمنى بتقولى عندك رياضى متقدم بكرة وده اليوم اللى الناس كانت بادئة فى تختبر اخر اختبار المعلومات!! روحت وكنا أقل من 20 واحد بس كنت فرحان على قلقان المهم جبت زمن ونطيت الثقة والمفروض اصلا اختبار ملوش نتيجة مادام نطيت ثقة المهم مجاليش حاجة بعدها وطلعت النتيجة وبعتولى نأسف لعد انضمامك ونتمنى لك التوفيق!!!

ربنا كان اعلم بحالى ساعتها وسافرت تانى يوم وقولت أروح اشوف الكلية بتاعتى إللى أنا أصلا مش حابها وكان برده إمتحان الترم قرب وباب التحويل قفل فقولت ده قدر ربنا كتبهولى ومفيش قدامى غيره وجبت جيد السنه ده ومع إنى مكنتش حاببها وكنت بشوف كل يوم بتوع تربية رياضية وهما بيتمرنو وانا ماسك الكتب ورايح ادرس حاجة مش حاببها وأنا اصلا رياضى من يومى ومش عارف أدرس اللى بحبه وأفتكر إن أول يوم جيت فيه الجامعة ده كنت جاى أقدم فى تربية رياضية اللى كان من وجهة نظرى وربنا أعلى وأعلم إن مستقبلها حلو ليا إنى رياضى وهعرف أتميز فيها وأشتغل بيها بعد التخرج وحاولت احولها من وانا فى 3!! بس طلعت بتاخد ثانوية حديثة بس وبرده قولت حكمة من عند ربنا كملت فى الأفريقى اللى مكنش باين ليه ملامح أو أى مستقبل بالنسبالى بس كنت بأجتهد فى حاجة ربنا إخترهالى وقدرهالى لعلها تكون خير ليا ورغم كل الصعوبات المعيشية والاسرية والسفر فى الكلية والغربة جبت فى 3و 4 جيد جدا والتقدير العام بقى جيد مرتفع وكنت عارف إن اللغة محدش يعرف عنها حاجة وعمرها ما انطلبت فى الكلية الحربية للمتخصصين ولا حد يعرفها بس كان عندى أمل فى ربنا على طول إن فيه خير جاى طالما بعمل اللى عليا وبسعى اللى بيحصلى ده فيه خير بإذن الله وكان عندى ثقة إن الخير ده جاى من ناحية الجيش, المهم اتخرجت وطبعا اللغة منطلبتش قبل كدا وانا كنت واخد انجليزى لغة تانية وعملت حاجة غريبة ...

- لما نزل إعلان متخصصين 2017روحت أسحب الملف على إنى تخصص انجليزى!! وجهزته وحطيت فيها شهادة التخرج "لغات الأفريقية" وقدمته على أمل انهم يعرفو إن فى حد بيدرس اللغة ده ويكونو محتاجنها بس مبيطلبوهاش علشان قلة الطلبة اللى بتدرسها فى مصر, والمفاجئة إن انجح سمات وأعدى بكل الاختبارات تانى أقفلها كلها وأوصل هيئة قولت اكيد عارفين إنى مش انجليزى وأنى لغات افريقية من الشهادة اللى مقدمها ودخلت الهيئة وعرفت نفسى وقولتلهم إنى تخصص لغات افريقية سواحيلى وأمهرى اتفاجؤ بيا وطبعا سقطت علشان مكنوش طالبين التخصص بتاعى! بعدها على طول دخلت الجيش وكان برده أملى كبير فى ربنا إن فى خير جاى من الجيش سواء ضابط احتياط اسافر حفظ سلام حاجة كدا .. ويوم التقديم فى الجيش خدو أسمى كلغة نادرة قولت خير قامو قالولى اللغة ده مش بتنطلب ضباط احتياط الحاجة اللى منعرفهاش ومش فى دفتر الترشيح بيدخلو عساكر بس !!! "صدمه برده حتى ضباط احتياط مجتش" بس قولت أنا نحس معاهم بس لعله خير ويوم سماع السلاح يتنده على أسمى أول أسم فى منطقة التجنيد ولوحده قولت شكلها خير اهوة يطلع إنى اتوزعت فى حرس الحدود صدمة برده! وإن إسمى كان أخر إسم جه السلاح علشان كدا اتنده لوحده أول أسم , قولت يمكن اروح مخابرات حرس حدود علشان اللغة وكدا وخير برده ثقة فى ربنا إن اكيد الكلام ده كله وراه خير أقوم اتوزعلى كتيبة ك 4 حرس حدود مقاتلة سانت كاترين جنوب سيناء!! صدمة برده قولت لعله خير والحمد لله روحت نقطة طابا مكان مريح خالص واللى بيرحوه وسايط تقيلة بس سبحان الله بمعرفه بسيطة خالص روحته وفى اخر جيشى تحصل الحاجة اللى كانت فى قلبى ومطمنانى دايما وثقة بربنا أن ربنا لا يضيع مجهود هباءًا وأن كل حدث خير ولكن لم أعرفه وقتها وسأعرفه لاحقا وأمامى قصة سيدنا موسى والخضر دائما!!!

4

إن اللغة السواحيلة تنطلب فى الكلية الحربية للضباط المتخصصين دفعة يناير 2018 وأول مرة!!! تنطلب وده اخر سنه ينفع أقدم فيها فى أى حاجة تبع الجيش ..

قدر ربنا ده ربنا اللى رتب كل ده ودخلنى اللغة ده وسقطت فى السنين ده كلها والحلم ده والتعب ده علشان ممكن يبقى كاتبلى إنى أبقى أول ضابط متخصص فى اللغة السواحيلية فى الجيش !

معقولة يكون ربنا بيعوضنى عن تعبى وصبرى وثقة فى الله دائما أن كل ما يحدث خير ولحكمة لا أعلمها وده جه وقتها ده كله دار فى دماغى وكنت وقتها ف اخر جيشى وقولت اذاكر انجليزى علشان أحاول اشتغل بيه لما اطلع قومت قال عليه وبدأت اراجع على السواحيلى وقدمت وعديت الاختبارات وقفلت كل حاجة ووصلت هيئة أنا وصاحبى ودفعتى فى الكلية بس 2 فقط فى التخصص النسبة فى تحقيق حلمى عدت كل الحدود خلاص ناقص تكة وان كل اللى حصلى كان خير ربنا مقدرهولى ومدبرهولى زى ما كانت ثقتى وإيمانى دايما بكدا وإن لو علمتم الغيب لأخترتم الواقع, وكان كلى تفاؤل وثقة وداخل الهيئة بكل فخر لرابع مرة يقوم مدير معهد اللغات يدينى قطعة اترجمها وفيها فعل اساسى مش عارفة ومتكرر حوالى 4 مرات فى سطرين والمعنى كله قايم عليه حاولت اترجمها على قد ما أقدر وحاسس إنى بغرق وروحى وبتطلع وأنا بترجمها وقدامى لواءات قاعدين وحلم حياتى وتعبى وقصتى اللى محدش منهم يعرف عنها حاجة بتضيع علشان قطعة وكان نفسى اقلهم على القصة بتاعتى ده بس مقدرتش اقول حاسس إن حاجة مسكتنى"حكمة برده من ربنا" وطلعت من الهيئة وصحبى كان جاله قطعه سهله وهوة نجح هيئة وانا سقطت!!!! وفى أخر جيشى وخارج للحياة سواد فى سواد وكان فى يقين جوايا بيقولى مستحيــــــــــــل يكون ده اخر قصتى مستحيل مع إن كل المقدمات بتقول إن كدا خلاص, بس كان ثقة فى ربنا إن مستحيل تعب عمرى كله يبقى ده اخره وصليت وقولت يارب أنا راضى باللى أنتا كاتبه وإن أمرى كله بيدك وخرجت من الجيش ومفيش شغل باللغة طبعا وبدور على اى حاجة اشتغلها وبشوف مصنع طوب "اللى قصتى فيه كبيرة" وشغل يوميات ابدأ اشتغله واصرف بيه على كورسات انجليزى وأعلى مستوايا فيه وبعدين أشوف بيه شغل...

5

سبحان الله صاحبى يسقط نتيجة نهائية وهوة كان لوحده فى التخصص!! صدمه برده واللغة تنطلب فى الدفعة الاستثنائية وانا كنت بدأت فى الإنجليزى قومت سايب ده كله وبدأت أذاكر السواحيلى تانى بأمل فى ربنا لا ينقطع وبسعى أمام قصة لابد اللى أن أمر بها وإن ربنا هو من يفتح بابها أمامى كل مرة وأقنعت صحبى يقدم تانى وإن ده سعى وإن مفيش شغل باللغة وده الفرصه الاخيرة والوحيدة حتى لو مستحيلة لازم نقدم فيها , قدمنا وذاكرت سواحيلى كويس طول فترة الاختبارات إللى ربنا اعلم كله مره كانت بتعدى عليا ازاى وقفلت برده كل حاجة ووصلت الهيئة وانا برا على السجادة بقول لازم اقولهم قصتى أنا ممكن برده تجينى قطعة صعبه ده حاجة بتاعه ربنا بس لازم مضيعش الفرصة ودخلت و جتلى قطعة صعبة بس الحمد لله كنت ذاكرت كويس ف فترة الاختبارات وترجمتها بامتياز وفرحو بيا وقالولى ممتاز اتفضل وفى وشهم القبول وإنى ناجح قومت واقف وقايلهم تسمحولى بكلمة يافندم! 

اتفاجؤ أنا فى مكان اللى فيه بيتوتر ومبيتكلمش وما بيصدق يخلص وإن فيه طالب بعد ما يجاوب صح والمفروض يطلع فرحان هوة اللى عايز يتكلم المهم بصولى بإندهاش وقام مدير معهد اللغات قالى بهزار طب بس هات ورقتى " ورقة الترجمه" واتفضل مع السيد مدير الكلية الحربية ! 

اللواء أ.ح جمال أبو أسماعيل, لسه هتكلم قام قايلى عارف أنك كنت مقدم الدفعة اللى فاتت وذاكرت وجيت! قولتله تمام يا فندم انا وقتها كنت فى الجيش ومكنشى عندى الوقت الكافى ولا الادوات الكافية علشان اذاكر بس سيادتك فى حاجة تانية عايز اقولها انا ده خامس مرة اقف فى المكان ده وبسعى لحلمى وكلى أمل فى ربنا ومعتمد عليه قبل كل حاجة وبحاول فى كل فرصة ربنا بيفتحها قدامى وبشهد ربنا من هنا إنى مقصرتش فى أى فرصة فتحت قدامى!!

قالى مدير الكلية الحربية: أنتا راجل تعبت واجتهدت واعتمدت على ربنا وإن شاء الله ربنا هيوفقك!

الراحة اللى حسيت بيها المرادى وإنى عملت كل اللى كان نفسى اعمله كله مره "وربنا ليه حكمة أنى متكلمش ف اى مرة والكلام يتعان للمرة الاخيرة ده ويبقى بالشكل ده" 

كله لحكمة وخلاص قولت اللى نفسى اقوله ومفيش بإيدى حاجة تانية أعملها والباقى بتاع ربنا بس.

انا مشيت القصة ده فى ظروف صعبه جدا لا يعلمها إلا الله بدون مساعده من أحد قريب أو غريب

وكل قرش اتصرف فيها بحر مالى وتعب جبينى وشقاء فى مصانع الطوب والعتالة ومن صغرى وأنا بحوش للحلم ده ومن بعدها شغل السياحة ودائما كان عندى ثقة وحسن ظن بالله...

النهاااردة النتيجة النهائية لاخر محاولة ده طلعت ومحصلش نصيب برده وشكلها تحريات حاجة مليش اى ذنب فيها

كنت كاتب القصة ده بنهاية تانيه خالص بأمل تانى خالص بس قدر لله ما شاء فعل

رجعت النهاردة لنقطة الصفر تانى دا لتحت الصفر كمان، الحمد لله ع المشوار ده ربنا ليه حكمه فيه ومكتوب من قبل ما اتولد وربنا اللى كان بيفتح سكة المشوار ده قدامى واكيد هيبقى ليه عوض بإذن الله

اللهم انى رضيت بقضائك وقدرك احفظ اللهم اسرتى فليس لنا سواك واجعلنى لهم كما تمنيت وقدرلى الخير ف مستقبل كله بيدك ولا اعلم عنه شئ وامتنى ع طاعتك يا الله

الحياة والله كلها حكم وده كون ربنا بيديره, كله ليه حكمة وكله لسبب وكله ليه وقت معين ومقدر له لازم الرضا والثقة بربنا فى السراء والضراء...