الكلية الحربية - شرح مفصل ليوم دخول الكلية واول اسبوع في الكلية

الناس اللي جالها الرساله ونجحت الف مبروك ليهم وربنا يوفقهم في الايام الجاية اما الناس اللي محصلهاش نصيب هدوا نفسكم شويه وبلاش يأس آه هو مستقبل و حياتك هتختلف و فى منكم إللى موقف حياته ع النتيجه
بس ف كل الأحوال مستقبلك ف إيد ربنا .. بإذن الله يختار لكم الأفضل

نتكلم عن الكليه بقى و النظام فيها ...
يومك بيبدأ بعد صلاة الفجر ب نوبه صحيان الساعه 4 و نص
سعادتك هتقوم من نومك وتدى تمام الجماعات ( بتدى تمام لعريف جماعتك انك صحيت ) ترجع ع سريرك تشد سريرك و تغسل وشك و أسنانك و تحلق دقنك و تغير
طابور اللياقه على 5 و ربع تقريباً هتجمع مع فرقتك
و بيخلص 7 و تلت
هتروح تنفذ الطابور مع فرقتك و ترجع تاخد شاور ع السريع و تلبس الأڤارول بتاعك و تشد دولابك و تستعد لطابور الفطار اللى بيبقى 8 و ربع تقريبا هتجمع مع فصيلتك
بتروح تفطر ف الميس و ترجع تانى ع طابور التفتيش الساعه 9 بردو مع فصيلتك
دا بيبقى عباره عن مرور سريع للتفتيش ع شعرك و دقنك و ملابسك و مظهرك العام
بتخلص الطابور و تجمع فرق و يبدأ اليوم التعليمى
عباره عن 3 محاضرات
تعليم أولى ( بيديك المبادئ العسكريه و الحركات و المشيه المعتاده و شغل السلاح و بيأهلك انك تعمل حفلة المستجدين بتاعتكم ).. ( دا قبل حفلة المستجدين
بعد حفلة المستجدين فترة التعليم الصباحى بتبقى معظمها محاضرات )
يا إما بيعلمك إزاى تتعامل مع السلاح .. بيشرحهولك و بيشرح خواصه ... و تركز قوى و تفهم و تحفظ محاضرات السلاح عشان دا هيلازمك من اول ما تبقى ضابط لحد ما تنهى خدمتك
و عموما هتلاقوا المحاضرات دى بتتكرر كتير
المحاضرات بتخلص على 3 الا تلت تقريبا
بتجمع طابور الغدا مع فصيلتك بعدها و تروحوا تتغدو ف الميس
بعد طابور الغدا بتجمع طابور أعمال السابع و التامن ... هو إسمه كدا
ف الأول هتلاقوا الطابور دا أعمال إداريه بعد كدا هتتفحووا ف بروڤات حفلة التخرج سواء عرض عسكرى أو عرض رياضى
هترجعوا العنابر إللى ياخد شاور و إللى يرقَّم مهماته و إللى عايز يروح للترزى أو الحلاق ( ممنوع التعامل مع الخدمات بالفلوس يعنى انت من حقك تخيط اى حاجه او احلق او تصلح شنطتك من غير ولا مليم)
بعد ما بتخلص أعمال السابع و التامن هتجمع طابور التمام الساعه 5 تقريبا
هتخلصوا الطابور و تجمعوا فرق تانى داخل ارض الطابور و تروحوا الفصول التعليميه ... و دا افضل وقت هتقضيه داخل الكليه .. المفروض انكم بتذاكروا فيه و كدا ( دا المفروض )
هتخلصوا فترة الدراسه المسائيه و تجمعوا طابور العشا مع الفصيله
تتعشوا ف الميس و ترجعوا ع العنابر تغيروا و تاخدوا شاور و لو معاك حاجه بتخلصها ع السريع
مش معاك بتمسك مصحفك تقرأ شويه قرآن قبل النوم و متنساش تقرأ سوره الملك

كام نقطه كدا ع السريع ..
داخل الكليه مينفعش تفرط ف حاجه من دول .. شرفك . مهماتك . فلوسك

انت #جامعى يعنى راجل متعلم و معاك مؤهل عالى
هتتخرج ملازم أول بعد اقل من 6 شهور
غيرك بيقعد 3 سنين ف ضغط نفسى رهيب و بيتخرج ملازم
مع احترامى لكل الناس

كل اللى هتشوفه و كل اللى هيحصل دا مجرد فيلم معروف و محفوظ و بيحصل كل سنه
و كل اللى هيسمعك كلمه عشان يستفذك و يختبر ثباتك الإنفعالى تأكد إنه سمعها قبلك 100 مره
انت بتتحط تحت ضغط نفسى عشان تتأهل انك تكون قد الحياه العسكريه

سنه رابعه هى إللى بتمشى الكليه هتكرههم ف الأول بس شوفهم بقى قبل التخرج هيبقوا عاملين معاك ايه و هتتوزع تخدم معاهم ف الوحدات وتهزوا و تضحكوا
سنه تانيه .. متحتكش بيهم كتير
اتعامل معاهم ف حدود قليله لحد ما تعرف اللى قدامك راجل ولا دماغه صغيره .. متنساش انك 24 سنه و بتعامل واحد عنده 17 سنه
لو حد منهم تطاول عليك متردش .. بص ع يافطة اسمه و بلغ عريف المستجدين بتاعك

اشترى احترامك بنفسك و متخليش حد يوجه لك ملحوظه
زميلك اللى معاك ف الفرقه مضغوط زيه زيك
ف متجوش ع بعض و ساعد زمايلك طالما تقدر

اول اسبوع هيعدى عليك تقيل جدا بعد كدا هتتعود و الايام هتجرى
هتلاقى اول زياره جات .. تانى زياره جات ..نزلت أجازه
و انتوا بتستلموا المهمات هتاخدوا كروت الدعوات تخليها مع اللى هييجى لك زياره و تخليه يحافظ عليها
هيبقى معاك 4 كروت ل 4 أفراد مسموح لهم بالزياره ... لو جه زياده عن 4 ف الغالب هيدخلوهم
طب امتى الزياره ؟؟
ف الغالب هتبقى بعد 20 يوم من دخولكم الكليه
هيتنبه عليكم و انتوا ف فرق المذاكره ع ميعاد الزياره و يخلوكم تكلموا أهاليكم ف التليفون و دى هتبقى من أحلى اللحظات
تخيل كدا أول مره تسمع فيها صوت والدك أو أخوك أو والدتك بعد غياب و تعب نفسى
الموقف مش سهل ... لو انت بتتنفخ جوا الكليه اياك تحسسهم بكدا و بلاش صوتك يحن اول ما يتقال لك عامل ايه و وحشتنا ... إياااااك
متقلقهمش عليك
و بردو ف الزياره ... انسى كل حاجه و اضحك و هزر معاهم عشان ابنهم راجل مش شويه تعب هيكسروه
و كفايه قعدتك وسط اهلك و مدير الكليه بيقول لهم ولادكم رجاله ... كفايه قوى

لو حسيت انت مدايق و مخنوق طلع همك ف الكتابه ... إكتب
هتستلم كشاكيل للمذاكره خلى واحد منها تكتب فيه اللى انت عايزه .. اكتب ملخص يومك ايه الحاجات اللى دايقتك و الحاجات اللى فرحتك
اكتب جوابات لأهلك لو تحب و ابعتها لهم مع جارك لو لقيت حد من منطقتك خليه يوصل لهم الجوابات و اديه رقم تليفون البيت و لو حابب يجيب لك حاجه م البيت خليه يجيب طبعا ف حدود الميرى
هيبقى معاك 2 أڤارول ...
واحد منهم سيبه واسع عشان تعرف تتحرك بيه ع راحتك و ابقى اغسله ف فتره الاعمال الاداريه يوم الجمعه
و التانى روح عند الترزى قيِّفه و ظبطه عليك كدا و شيله ف الدولاب ليوم الزياره عشان تبقى ع سنجة عشره قدام أهلك

و انت داخل بعد ما تستلم مهماتك هيتقال لك ع شويه ورق كدا تجيبهم معاك
لو ملحقتش مش مشكله خللى اى حد يجيبهم لك و يسيبهم بإسمك و فرقتك عند الإستعلامات

و انت بتسلم نفسك خد معاك مناديل جيب ... فاين و كدا متاخدش مناديل بكر
هتحتاج ل أطقم داخليه

كل إللى فات كوم و اللى جاى كوم تانى ...
مش بخوفك بس بقولك استحمل و خد النجمتين غرض ثابت قدامك