تجارب التقديم - تجربة مقدمة من العضو ادهم علي لشرح الطبي المتقدم بالتفصيل متخصصين حربية
هنتكلم عن تجربتي2018 ونصايحي في يوم( العرض الطبي العام) حربية متخصصين2018
او ما يعرف بالطبي المتقدم او العرض العام
مش هنختلف في المسميات من اولها عشان خلقي ضيق فمتزعلنيش منك
وسيبني اكمل كلام اتفقنا
(تجربتي كطالب كلية حقوق) وهي بتنطبق علي الكل بإختلافات لاتذكر يعني
علي بركه الله نبدأ:
(1)- الصيام وده اول وأهم حاجه تصوم تقريبا 6 ل 8 ساعات ويفضل 8 قبل وقت الكشف (عياده التحاليل) وبتفصيل اكتر عشان البوست ده بتاع التفاصيل هتصوم من 10 بليل كده عشان تبقي جاهز للتحاليل وقت الكشف الساعة 6 الصبح او اي وقت حسب هتدخل عياده التحاليل امتي يعني
نصايح:
-الصيام عن الاكل والمشروبات ويفضل الميه كمان بس لو عطشت اوي اشرب حاجه بسيطه منعاً للتعب مش اكتر (التحليل مطلوب تكون صايم )
مش زي الطبي الاولاني عن الأكل بس
لانه كان يخص كشف السونار انما ده دم وبول وكده
-لما تبقي هناك متدخلش الحمام وهتتمنع اصلا في الغالب انك تدخل عشان هتحتاج تاخد عينه بول فمتفضيش المخزون الاستراتيجي يا معلم ووقت التحليل متلاقيش حاجه
(2)- هتكون لابس سلب سبعه ابيض زي الطبي الاولاني وفيه ناس كانت لابسه شورت ابيض وبيقولهم شموره بس متجيبش لنفسك الكلام
امشي بالمطلوب من الاول احسن لفت الانتباه في الكشف الطبي مش في مصلحتك اسمع مني (نصيحه غالية)
وتاخد معاك جاكت محترم تقيل تلبسو وقت الكشوفات لأن الجو الصبح زفت
(3)- هتكلم بترتيب العيادات بالنسبالي بتختلف من شخص لأخر علي فكره
- اول حاجه اسمها كشف ظاهري بيجيلك رتبه ظابط يوقف مجموعتك صف وبيشوف ايدك ويخليك ترفعها تفردها وشكلك العام ووشك وضوافرك ونضافتك العامة وبيشوف ايدك بتعرق ولا لأ فإمسح ايدك في الشورت معظم الوقت سواء في الكشف ده او في كشف الجلدية عشان ناس كتير طلعت بسبب ده (نصيحه غاليه) واخر حاجه بيخليك تغمز بعينك مره اليمين ومرة الشمال وكده خلاص
-اول عياده قوام وتناسق اللي هي وزن وطول
لو تمام بتكمل مش تمام بتتعرض مستشار بيشوفك
ويشوف هيئتك وطولك علي الحيطه لو الجهاز طلعك قصير مثلا
او يشوف لو وزنك زاد ترهلات ولا عضل
او لو خسيت بزياده يشوف ده خلاك نحيف ومعضم ولا عادي
وهكذا لو شافك تمام بيرجعك مجموعتك الوضع معجبوش يبقي مفيش نصيب
- تاني عياده الاشعة بتدخل زي االطبي الاولاني والدكتور جوه بيوجهك تعمل ايه وتقف ازاي
الغريب بقي ان فيه ناس طلعت اشعه رغم انها عدت في الاشعه اللي كانت في الطبي الاول وللأسف مفيش ليها مستشار او التماس لو وقعت فيها
-تالت عياده كانت التحاليل وبتاخد استيكرات عليها اسمك واسماء انواع تحاليل الدم وبتروح تبصم مع الدكتور علي استيكر منهم وبيديك (علبه لتحليل البول - و5 انابيب اللي بيتحط فين الدم بتاعك ) بتلزق عليهم الاستكرات دي وغالبا الدكتور بيساعدك في القصه دي
وبتدخل لدكتور في اوضه ياخد منك عينه الدم وبعدها بتروح الحمام عشان تاخد لنفسك عينه البول وعسكري بياخد منك العلبة اللي بتملاها في الحمام
- رابع عياده كانت الرمد بتدخل وبيعملك اختبار عمي الألوان عالسريع وبيخليك تقعد تاني وبيقفلك عين وتشوف بالتانيه زي الاختبار في الطبي الاولاني بس برتم اسرع شوية مش اكتر
- خامس عياده كانت الباطنه بيفضل يحسس علي بطنك ويضغط ويخليك تفرد دراعاتك فوق وقدام وتتنفس ويحط السماعة وحاجات زي كده كان عالسريع بردو
-سادس عياده كانت الجلدية وطلع ناس كتيره فيه للأسف اغلبهم كانو طلعوا بردو في الطبي الاول جلدية وراحو لمستشار وعداهم لكن وقعوا تاني في الطبي المتقدم بس بتكون لاسباب واضحه الصراحه الكلام ده علي مجموعتي اللي كانت معايا زي (حبوب غزيره في الوش او الظهر- علامات وخياطه واضحة في الوش)
النصائح المهمه جدا جدا هنا : - امسح ايدك في الشورت في العياده دي قبل ما تدخل واثناء منتا واقف وطبعا وايدك جنبك عشان متلفتش الانتباه فيحس انك بتعمل حاجه غلط واصلا الدكتور في الطبي الاولاني كان بيقولنا امسح ايدك بس مش كل الدكاترة بتقول فخاف انت علي مصلحتك من البداية الناس مش زي بعضها
(تاني) امسح كف ايدك كويس في الشورت عشان اتنين من مجموعتي وقعو بسبب حاجه بسيطه زي دي وهما اصلا في العادي معندهمش المشكله دي
-النصيحه التانيه بخصوص حلاقة الدقن بلاش تحلق عكس اتجاه نمو الشعره عشان هتطلعلك حبوب ممكن توقعك في الكشف الحل عن تجربة تسيب الدقن كام يوم ومتحلقهاش الا قبل ما تسافر للكشف بساعات وتحط بلسم بعد الحلاقة علي الاقل لو ممنعش الالتهاب هيأخره لبعد الكشف (نصيحة غاليه )
- (تالت) مره امسح كف ايدك في الشورت سواء عندك مشكله العرق دي او لأ الواحد بيحزن علي الناس لما تبقي سليمة وتطلع علي حاجه زي دي
- سابع عياده الاسنان زي الطبي الأولاني وكانت عالسريع بيقولك افتح بوقك وعض علي سنانك وشكرا
-تامن عياده العظام هي والجلدية اكتر عيادتين طلعو ناس بأسباب واضحة وأسباب غير واضحه بيبقي نفس الكشف زي الطبي الأولاني اذا مكنش اكتر انتو اخواتي يعني العياده دي الطبي الأولاني كان بيبقي فيها بال30 واحد واكتر
انما في الطبي المتقدم بيبقي نص العدد تقريبا فبيبقي في تركيز اكتر
وانا من تجاربي بقول ان العياده دي بيبقي مطلوب منا اكبر تصفية للعدد
ففيه ناس كتير بتيجي في الرجلين فنصيحتي في العياده دي مترتبكش ومتشدش رجلك جامد فيحس انك بتحاول تخبي حاجه وتلفت انتباهه
ابعد عن لفت الانتباه في العياده دي خالص ده لمصلحتك طالما انت وصلت لطبي متقدم يبقي بنسبة كبيرة سليم متربكش نفسك عشان الربكه دي لوحدها هتتسبب في طلوعك . العياده بيطلع فيها حوالي 3 او 5 من المجموعة في الاغلب منهم اللي عنده فعلا مشكله وفلت في زحمه الطبي الأولاني
ومنهم تصفيه اعداد وهنا بقي انت ونصيبك
- تاسع عياده كانت الأنف والأذن نفس الطبي الأولاني وكانت عالسريع
- عاشر عياده كانت الجراحه نفس اللي حصل في الطبي الأولاني بالظبط
- العياده ال11 كانت النفسية وبتقول اسمك وكليتك و44 و66 نفس الاختبار الطبي الأولاني عالسريع بردو
- العياده ال 12 كانت قاع العين نفس اللي حصل في الطبي الأولاني
-العياده ال 13 الموجات الصوتيه (السونار) مشتغلتش اصلا لسبب غير معروف
- العياده ال 14 كانت رسم القلب نفس اللي حصل في طبي الاولاني اهم حاجه متخفش ومترهبش نفسك ولا تجري وانت رايح للعياده مثلا عشان دقات قلبك متزيدش وتقع في الكشف ده
غير كده انت تمام مدام عديته قبل كده
- العياده ال 15 القلب وهي نفس الفكره بس دكتور بيسمع دقات قلبك بالسماعة وخلاص علي كده خليك هادي دي اهم حاجه
- العياده ال16 السمعيات هي غرفة كده شبه الاسانسير وبتدخلها وتقعد علي الكرسي وتلبس سماعة علي راسك والدكتور بره وانت ضهرك ليه وهو بيعملك شبه صفاره او زنه كده وبتبقي خفيفة جدا يعني متتغرش بكلمه صفاره دي خالص هتحس انها زنه خفيفة كده يا إما من الودن اليمين او الشمال ولما تسمع الصفاره الخفيفه في اليمين بترفع ايدك اليمين ولو سمعت من ودنك الشمال بترفع ايدك الشمال وهو بيفضل يقلب الصفارة بين الودنين وانت تفضل تشاور بقي علي حسب سمعت منين
اختبار سهل بس ركز لأن الصوت خفيف عكس ما هتتوقع فركز مع اي صوت
بتخلص انت ومجموعتك وبتنزل تلبس وتستني النتيجه وبعد نص ساعه
بتعرف نتيجه كل الكشوفات ما عدا التحاليل طبعا
اللي وقع في كشف واحد بس ليه عرض علي مستشار تاني يوم
بس فيه عيادات ملهاش للاسف
زي عياده الاشعة اللي بيقع فيها بيبقي ملوش نصيب لكن الاغلب فيه
واللي وقع في اكتر من عياده بيبقي ملوش نصيب
واللي بينجح في كل العيادات قالوله تعالي بعد يومين اسأل الاستعلامات علي نتيجه التحاليل لو نجحت فيها بتتمتحن في نفس اليوم رياضي متقدم
لو لقدر الله منجحتش في التحاليل يبقي مفيش نصيب
واللي رايح يسأل علي نتيجه التحاليل يبقي طبعا رايح وجاهز ومعاه لبس للرياضي ومايوة عشان نطة الثقة
وهما طلبو كمان أصل شهاده التخرج تكون معاك
وموقف التجنيد تاخد الاصل والصورة احتياطي
و محدش يعرف تفاصيل الرياضي المتقدم لسه واخيرا اتمني اكون وفقت في توصيل كل معلومة عن اليوم ده
ولو نسيت حاجه فإعذروني ولو كلامي شوفته غلط سيبك خالص من البوست ده واعمل انت بوست وقول الصح من وجهه نظرك وفيد الناس
الغرض الاول هو الاستفاده ودي تجربتي وبشاركها معاكو مش اكتر
............بتمني للجميع التوفيق .........
(وعسى أن تكرهوا شيئا وهو خير لكم
وعسى أن تحبوا شيئا وهو شر لكم
والله يعلم وأنتم لا تعلمون)
اعمل اللي عليك وسيبها علي ربنا
الخير فيما اختارة الله
تعليقات
إرسال تعليق