البطل الشهيد خالد مغربي

خالد مغربى دبابه ، خالد مغربى الشهير بدبابه . .
أقولك أنا قالوا ايه عن بطل مختلف أسمه البطل الشهيد النقيب ( خالد المغربى ) الشهير ب ( دبابه ) ..
خالد إتشرف و شرف الكلية الحربية مصنع الرجال فى أكتوبر 2011 ضمن قوة الدفعة 108 حربية اللى أتخرجوا فى يوليو 2014 برتبة الملازم تحت الإختبار ، خالد كان طالب مشهور وسط دفعته بجدعنته و رجولته ده غير أنه كان ضمن فريق الكفاءة البدنية للكلية نظرا لأن لياقته كانت عاليه جدا و لما وصل سنة رابعه حربية كان رقيب فصيلة يعنى مسؤل عن طلبة يتحمل مسؤليتهم و يسأل عنهم و يعاقب على خطأهم و ده بيخليه يمارس قيادة بدرى و يتحمل المسؤليه بدرى عن دفعته كان حلمه يدخل الصاعقة و نفسه و منى عينه يلبس الأفرول الصحراوى اللى شرف لأى ضابط مصرى أنه يلبسه و يخدم ضمن النخبة القليلة اللى بتلبس الأفرول ده ، مش هاقولك خالد كان فى حاله و غلبان وماشى جنب الحيط لأن خالد ماكنش كده خاااالص كان طالب شقى فى الكلية لكن محبوب جدا ياخد الطلبه بتوعه اللى مخليهم يعشقوه رغم أنه بينفخهم فى التدريب و يطلع يلعب بيهم لياقة الفجر قدام مكتب قائد اللواء اللى يصحى يقوله يا رقيب خالد يا مغربى مش عارف أنام إنصراف من هنا وكان يطلع يجيب حاجه من العنبر فى وقت ممنوع فيه التواجد فى العنبر ويحصل مرور مفاجئ ولو اتمسك هياخد جزاء شديد فينط من الشباك و يطلع على المواسير ويفضل متشعلق لحد ما المرور يخلص و ينزل و يدخل من الشباك طبعا ممكن ناس تشوف ده جنان و تهور لكن أحب اقولك بخبرة 15 سنة فى المجال ده ظابط صاعقة كما أنزل و كما يجب أن يكون لازم حبة الجنان دول لأن طبيعة شغله و مهامه أصلا كلها جنان فى جنان و لو هتعقلها عمرك ما هتنفذها لأنها غير منطقية تماما علشان كده أسمهم رجال المهام المستحيلة ..
أنا كنت نقيب فى المجموعه 129 صاعقة فى 2014 و أستقبلت ضباط من الدفعه 108 حربية اللى ضموا على الصاعقه شاطرين جدا محترمين طالعين متأسسين كويس أوى من الكلية كان خالد واحد من ضباط المجموعة لكن مش معايا فى الكتيبة لأنه أتخرج على كتيبة الأبطال اللى فى رفح قابلته مره واحده كان جاى لدفعته عندى فى الكتيبه ووقفت أتكلمت معاه قلتلهم ايه ده !!؟ ده دفعتكم !!؟ الظابط ده مختلف فيه حاجه مختلفه الظابط ده أنا حاسس أنه أكبر منكم حاسس أنه قديم عنكم جسمه شكله طريقته أسلوبه ظابط مختلف ده كان إنطباعى الأول عنه ولو كنت أعرف أنى واقف قدام بطل شهيد كنت حضنته وقبلت راسه و إتشرفت بيه أكتر ..
ظابط قائد كتيبته قال فيه شجاع بطل شخصية قلب ميت لياقة عاليه جدا مقدام بشكل غير طبيعى مؤمن بقضية بلده عاشق ترابها حقق خساير فى التكفيريين غير عاديه عارفينه بالأسم رغم صغر سنه و رتبته ظابط أنا خسرته ومش عارف أمتى ممكن يجيلى حد زيه ظابط صعب جدا يتكرر ظابط أعتمد عليه و أنا مغمض أبعته أى مكان و أنا عارف أنه هينفذ على أكمل وجه ولما بس أزعل منه يفضل يتنطط ويكلمنى و هو فى الأجازة كل يوم ميت مره بس علشان أقوله أنى مش زعلان بطل جدع أبن بلد وبطل بكل ما تحمل الكلمه من معنى و قول زى ما أنت عايز تقول و أوصف زى ما أنت عايز توصف هتلاقى كل ده موجود فى خالد و زياده ) ..
أما عن حياته الشخصية فاهو متزوج قبل إستشهاده بأربع شهور فقط و زوجته حامل فى طفل هيسمع عن بطولة أبوه و يشوف صور له و كام فيديو لكن مش هيقدر يحس بحنانه ومساندته و حضنه فى الدنيا لأن أبوه دفع دمه فدا تراب بلده .. وسلام على من يقاتلون فى الليل و فى الصباح بالأكفان قد عادوا سلام عليهم جميعا حتى نلتقى ..
الشهيد البطل النقيب ( خالد المغربى - دبابه )